سهند
'سهند ' '“Səhənd”'داغی آذربایجانین ان بؤیوک و اؤنملی سیلسیله‌لریندن بیری، شرقی آذربایجانین مرکزینده، تبریزین گونئیینده و اوجان (بوستان آباد)ین جنوب-شرقینده، ماراغانین قوزئیینده یئرله‌شن مشهور وولکانیک داغلاردان بیریدیر. [2][3] بو داغ سیلسیله‌سینده هوندورلویو 3000 متردن چوخ اولان 17 ذیروه وار کی، اونلارین ان هوندورو 3707 متر اولاراق، اوجانین شهرینین حدودلاریندا یئرلشیر [4] و اوستانین ان هوندور نقطه‌‌‌سی‌دیر.
آذربایجانین ان اؤنملی سؤنموش وولکانیک داغلاریندان بیری حساب ائدیلن سهند، بیتکی‌لرین، چمن‌لرین، چیچک‌لرین و اوتلاقلارین بوللوغونا گؤره آذربایجانین داغلارینین گلینی کیمی تانینیر؛ [5] چونکی بو داغ سیلسیله‌سی‌نین بوتون اراضی‌لری یاشیللیقلارلا اؤرتولودور. کامال، جام، سهند، بوز داغ، آرونه، زری داغ، بؤیوک داغ، کریم داغی، لیقوان داغی، سولطان داغی، دمیرلی، آغ داغ، موتال داغی، قیبله داغی، ارشد داغی، شیر داغی، حرام داغی، گیروه داغی، چان ، اوو داغی، آتاشان و درویش‌لر سهند داغ سیلسیله‌سی‌نین ان اؤنملی ذیروه‌لریدیر. گؤزل و سئحیرلی شاه یوردو دره‌سی، جام ذیروه‌سی‌نین قوزئیینده یئرله‌شیر.
سهدین قوزئی جبهه‌سینده تبریز و اوجان دوزنلیک‌لرینه باخان کامال (قوچ گؤلو)، بؤیوک داغ، آرونه داغی، بوز داغ، مئتال، دمیرلی و س. سهند سیلسیله‌سی‌نین ان هوندور حیصه‌سینی تشکیل ائدیرلر. سهند سیلسیله‌سی‌نین‌نین جنوب ذیروه‌لری ماراغا دوزونه باخیر.
سهند سیلسیله‌سی‌نین یاماجلاریندا کندلر، باغلار و تارلالارلا بیرلیک‌ده ان گؤزل آللوویال وادی‌لر (دره‌های آبرفتی) حئیرت آمیز گؤرونتولر یاراتمیشدیر [6]. ساوالان‌دان سونرا سهند داغی آذربایجانین ان بؤیوک و اؤنملی سیلسیله‌لریندن بیری و تبریزدن 50 کیلومتر گونئی‌ده یئرله‌شن ان مشهور سؤنوک وولکانیک داغلاردان بیریدیر.
تأسفله، سون ایللر سهند داغ سیلسیله‌سی‌نین اتک‌لرینده، خوصوصی ایله ده اوجان شهرینین اطرافیندا پوکا معدن‌لری ایشه سالینیب کی، بو دا شهرستانین اکوسیستمی‌نین پوزولماسینا سبب اولوب.
سهندین ایقلیمی
'
سهند داغلیق بؤلگه‌سی‌نین ایقلیمی دیگر داغلیق بؤلگه‌لر کیمی ائنلیک، هوندورلوک، یوکسکلیک رطوبت‌لری، کولک‌لره معروض قالما، دنیز و بؤیوک گؤللرین اولماسی، هاوا آخینی‌نین تضییقی و یاغینتی کیمی عامل‌لره تابع‌دیر. سهند داغلیق بؤلگه‌سی سویوق ایقلیمه مالیک‌دیر و ذیروه‌لرده یاغینتی‌نین مقداری 600-700 میلی‌متر، اطراف‌دا ایسه تخمینا 300-500 میلی‌متردیر.
'سهندین چایلاری
سهنددن باشلانان چایلار اورمییه گؤلو ایله خزر دنیزینین حوضه‌‌‌‌لرینه تؤکولور. سهنددن آخان ان اؤنملی چایلار بونلاردیر:
اوجان چایی
سئیدآوا چایی
صوفی چایی
لووان چایی
زینجانا چایی
اوسکو چایی
توفارقان چایی
قالا چایی
موردو چایی
لئیلان چایی
قارانقو چایی
'ایدمان و أیلنجه فعالیت''لری'
بو داغ یاز و یای آیلاریندا داغچی‌لاری قارشیلاییر.
سهند خیزک پیستی تبریزدن اوجانا گئدن یولدا و قیش مؤوسومونده آکتیودیر.
قایناقلار:
1. بختیاری، سعید (۱۳۷۹). اطلس کامل گیتاشناسی سیاسی، طبیعی، اقتصادی. مؤسسه جغرافیا و کارتوگرافی گیتاشناسی. ص. ۸۵.
2. «سهند داغی ایله تانیشلیق - شرقی آذربایجان»
3. «سهند؛ دوم دورو بولاقلار داغی/ سهند داغی‌نین میللی سیاهییا داخل ائتمه‌سی»، مهر خبر آژانسی.
4. «سهند؛ دوم دورو بولاقلار داغی/ سهند داغی‌نین میللی سیاهییا داخیل ائتمه‌سی»، مهر خبر آژانسی.
5. «آرشیو‌لشدیریلمیش نوسخه». 1 آوقوست 2018-جی ایل تاریخیندهاوریژینالدان آرشیو‌لشدیریلیب. 21 مای 2019-جو ایلده آلینیب.
6. مجموعهٔ راهنمای جامع ایرانگردی، استان آذربایجان شرقی، حسن زنده‌دل، چاپ اول، صفحهٔ ۸۶
