کوبلان
کوبلان (Koblan) (رسمی سندلرده کُهبنان)، شرقی آذربایجان اوستانینین کندلریندن بیری، قیزیل اوزن (Qızılüzən) چایینین ساحیلینده و مییانا شهرستانینین مرکزی حیصهسینین گونئی گرمه دهستانیندا یئرلهشیر. بو کند مییانادان 40 کیلومتر شرقده، مییانادان خالخالا گئدن یولون اوستونده یئرلهشیر. کند مییانا شهرینین مرکزیندن 50 کیلومتر آرالیدا یئرلهشیر[1].
پیللهلی کوبلان کندی داغین اتهیینده، گؤزل بیر درهنین قوینوندا یئرلهشیبدیر. بو درهدن خالخالدان باشلایان هئشین چایی کئچیر. کوبلان کندینین چوخ گؤزل و بنزرسیز طبیعتی وار. او اوزدن هر ایل خصوصی ایله ده یاز و یای آیلاریندا بیر چوخ توریست بو کندی زیارت ائدر.
ائتیمولوژیسی
کندین آدی قافلانتی آدی ایله تانینان کنده بیتیشیک داغلاردان آلینمیشدیر. قافلان، قاپلان، کاپلان، کابلان و کوبلان بیر آدین فرقلی تلفظ فورمالاریدیر و تلفظ آسانلیغی اوچون قافلان سؤزونون حرفلری دهيیشدیریلرک یارادیلمیشدیر. قافلان و کاپلان آذربایجان تورکجهسینده ببیر دئمکدیر. اونا گؤره ده کوبلان کندی «ببیر کندی» دئمکدیر[2]. بو آرادا کوبلان آدی سادهجه آذربایجان تورکجهسینده دئییل، بلکه دیگر تورک دیلی لهجهلرینده ده اونون ایزلرینی گؤرمک مومکوندور. مثلا قازاخ تورکلرینین قهرمانلیق داستانینین آدی «کوبلاندی باتیر»دیر[3].
آذربایجاندا قهرمانلار دؤیوش قابیلیتلرینه گؤره قافلانا و آسلانا بنزهدیلیر و اونلارین آدلاری کیشی آدی کیمی ایشلهدیلیر، هابئله بؤیوکلوک و عظمت حیسی آشیلاماق اوچون کند، داغ، دره آدلارینا دا عاید ائدیلیر. آسلان (اسلان)، اراسلان (ارسلان) و شیرخان کیمی شخص آدلاری و کوبلان آدی ایله قافلانتی داغینین آدی بو کاتئقوریدهدیرلر[4].
اهالیسی
ایران استاتیستیکا مرکزینین 2016-جی (1395-جی گونش) ایلده عمومی اهالی و منزل سییاهییا آلماسینین نتیجهلرینه اساسا، بو کندین اهالیسی 230 نفر، عایلهلرین سایی ایسه 97 عایلهدیر[5]. آمما کندلیلر کنددن کؤچدویو اوچون، کندین اهالیسینین ساییسی گونو-گوندن آزالماقدادیر. دئییلنلره گؤره کندین اهالیسی حاضیردا 200 نفردن آزدیر. اقتصادی و یا داها دوغروسو مناسب ایش اولماماسی سببیندن کند عایلهلرینین چوخو تهران و اونون اطرافینداکی شهرلره، یا دا مییانا شهرینه کؤچمک مجبوریتینده قالمیشلار، قالانلاری ایسه یا مییانا شهرینده فهلهلیکله و یا امکلیلیک و بونا بنزر گلیرلرله کئچینیرلر.
کوبلانین اهالیسینین ائتنیک کؤکهنی تورک، مذهبی ایسه شافعی مذهب سوننو مسلمانلاردان عبارتدیر.
قایناقلار:
- روستای کهبنان (کوبلان)، 2022-جی ایلین اییون آیینین 22-ده آلینمیشدیر.
- نگاهی نوین به اسامی کهن در شهرستان میانه، دکتر فیروز سیمینفر، نشر اختر، 1378.
- کوبلاندی باتیر(قازاخ خالق قهرمانلیق داستانی)، چئویرن: نظامی محمد اوو، کؤچورن: میلاد بالسینی، آذر توران نشریاتی، بیرینجی چاپ ۱۳۹۹.
- نگاهی نوین به اسامی کهن در شهرستان میانه، دکتر فیروز سیمینفر، نشر اختر، 1378.
- نتایج سرشماری عمومی نفوس و مسکن ۱۳۹۵، مرکز آمار ایران.